KATIBU MKUU

Prof. Sifuni Ernest Mchome, Katibu Mkuu Wizara ya Mambo ya Katiba na Sheria ana Shahada ya Uzamivu ya Sheria ya Chuo Kikuu cha Dar es salaam, Shahada ya Uzamili ya Sheria ya Chuo Kikuu cha Queens cha nchini Canada na Shahada ya Kwanza ya Sheria kutoka Chuo Kikuu cha Dar es salaam.

Kabla ya kuteuliwa kushika nafasi hii, Prof. Mchome alikuwa Katibu Mkuu Wizara ya Elimu na Mafunzo ya Ufundi kati ya 2013 -2015 na mwaka 2010 hadi 2013 alikuwa Naibu Katibu Mtendaji na baadae akawa Katibu Mtendaji katika Tume ya Vyuo Vikuu nchini (TCU).

Prof. Mchome alianza utumishi wa umma mwaka 1989 katika Ofisi ya Mwanasheria Mkuu wa Serikali Kanda ya Arusha, baadae alihamishiwa Chuo Kikuu cha Dar es Salaam ambapo mwaka 1990 hadi 1992 alitumikia kama Mkufunzi Msaidizi, mwaka 1992 hadi 1997 alikuwa Mhadhiri Msaidizi, mwaka 1997 hadi 2001 alikuwa Mhadhiri, mwaka 2001 hadi 2006 kuwa Mhadhiri Mwandamizi na mwaka 2006 hadi leo hii ni Profesa. Pia alifanya kazi za uongozi katika Shule ya Sheria ambapo mwaka 1997 hadi 2002 alikuwa Naibu Mkuu wa Kitivo cha Sheria anaeshughulikia masuala ya Utawala, mwaka 2003 hadi 2006 alikuwa Mkuu wa Idara ya Sheria za Madai na Jinai na mwaka 2006 hadi 2009 kuwa Mkuu wa Shule ya Sheria chuoni hapo.

Katika muda wote aliotumikia Chuo Kikuu cha Dar es Salaam kama mtumishi Prof. Mchome aliweza kufanya tafiti mbalimbali na kuchapisha machapisho yenye taarifa mbalimbali ambazo zilisaidia katika maendeleo ya nchi yetu. Baadhi ya kazi hizo ni “Strengthening the Prosecution System in Tanzania” iliyochapishwa kwenye kitabu cha Chirwa DM., et al, Accountable Government in Africa: Perspectives from Public Law and Political Studies, Juta, RSA, 2011; “Constitutional Developments in Tanzania: Implications of the Proposed 14th Amendments of the Union Constitution and other Developments with Constitutional Implications”, iliyochapishwa kwenye kitabu cha Lawrence Mute, Constitutionalism in East Africa: Progress, Challenges and Prospects in 2004, Fountain Publishers, Kampala, 2007; “Is the Refugee Problem Ending?: A Historical Perspective”, iliyopo kwenye Nyerere Law Journal, 2005; “A Cursory Look at the Refugee Policy and Legal Framework in Tanzania”, iliyopo kwenye Eastern Africa Law Journal 2005; na “Transformation of the Prosecution System in Tanzania: Concept Paper” iliyotayarishwa kwa ajili ya Ofisi ya Mwanasheria Mkuu wa Serikali, 2004. Prof. Mchome pia amefanya kazi mbalimbali za kujenga uwezo katika Jeshi la Polisi Tanzania, Jeshi la Magereza, Ofisi ya Mwanasheria Mkuu wa Serikali, Ofisi ya Mkurugenzi wa Mshtaka ya Jinai, Mahakama ya Tanzania, Idara ya Ustawi wa Jamii, n.k.

Mbali na nafasi mbalimbali alizohudumu katika utumishi wake wa umma, Prof Mchome aliweza kushiriki katika kazi mbalimbali za kitaifa ambazo ziliwezesha kupatikana kwa mifumo, vyombo au taasisi mbalimbali za umma na hivyo kuweza kutatua matatizo ya uendeshaji katika maeneo husika, miongoni mwa kazi hizo ni pamoja na kuwa kiongozi wa timu ya kupitia sheria na kupendekeza mfumo wa sheria utakaoendana na mpango wa vitambulisho vya utaifa; kuongoza timu ya wataalamu iliyotengeneza mtaala wa mafunzo ya jinsia kwa Jeshi la Polisi; Kuratibu timu iliyopitia Kanuni za Kudumu za Jeshi la Polisi (PGOs); kuratibu timu iliyopitia Kanuni za Kudumu za Jeshi la Magereza (PSO); na kuwa Mtaalamu Mshauri katika Uhuishaji wa Mfumo wa Mashtaka ya Jinai nchini, Uandaaji wa Sheria ya Huduma ya Mashtaka ya Jinai kwa ajili ya Wizara ya Katiba na Sheria pamoja na kuandaa andiko la Maelekezo kwa Waendesha Mashitaka kwa Tanzania Bara na kwa Zanzibar. Kazi hizi ni miongoni mwa kazi nyingi ambazo Prof. Mchome kama mtumishi wa umma mwandamizi amekuwa akishiriki katika kuhakikisha changamoto mbalimbali zinapatiwa ufumbuzi.

Prof Mchome pia ni mnufaika wa programu za Fulbright Fellow na The Madeline and Kevin R. Brine Charitable Trust Fellowship ambazo zilimwezesha kufanya tafiti mbalimbali kupitia Kituo cha Mahusiano ya Kimataifa cha Chuo Kikuu cha New York huko nchini Marekani kati ya mwaka 2002 hadi 2003. Amekuwa pia mjumbe wa Bodi mbalimbali ikiwemo Bodi ya Mfuko wa Utamaduni Tanzania; Bodi ya Shule ya Sheria Chuo Kikuu cha Dar es salaam; Bodi ya Chuo cha Mahakama, Lushoto (IJA); Bodi ya Baraza la Elimu ya Ufundi Tanzania (NACTE); Bodi ya ESRF na Bodi ya TaGLA.