Katika kuhakikisha kuwa haki inapatikana kwa wananchi wote kwa usawa na kwa wakati, Wizara ya Katiba na Sheria kupitia Idara ya Huduma za Msaada wa Kisheria imeungana na Kanisa la Dodoma Pentecostal katika  kuadhimisha miaka 6 tangu kuanzishwa kwa kanisa hiko kwa kutoa huduma za Msaada wa Kisheria kwa waumini wa Kanisa hilo.

Akizungumza mara baada ya kuhitimisha zoezi la utoaji wa huduma, kanisani hapo 24 Oktoba, 2026, jijini Dodoma, Wakili wa Serikali kutoka Wizara ya Katiba na  Sheria, Geofrey Mwachae amesema kuwa jumla ya wananchi  50 wamepatiwa huduma za msaada wa kisheria ambapo kati yao wanaume ni 26  na  wanawake 24.  

Mwachae alisema, huduma zilizotolewa  zilihusisha masuala ya  ardhi, ndoa, mirathi, matunzo  ya watoto na huduma ya uandishi wa nyaraka za kisheria. 

Aidha, waumini  hao walipatiwa elimu juu  ya ukatili  wa kijinsia, elimu ya  uraia na haki na wajibu.

Mchungaji wa kanisa hilo, Dkt. James Kesanga   ameishukuru Wizara ya Katiba na Sheria kwa kukubali  kushiriki katika Maadhimisho  hayo kwa  kutoa huduma za Msaada wa Kisheria. 

“Tunaishukuru wizara kwa kukubali mwaliko wa kuja kutoa huduma hizi, kwa kweli huduma ni nzuri na muitikio pia umekuwa mzuri kwa kuwa wananchi wengi wanauhitaji wa huduma hizi za kisheria.” alisema  Dkt. Kesanga. 

Aidha, Dkt. Kesanga ameiomba Wizara  kuendelea kutoa huduma hizi kwa wananchi pamoja na kuchukua hatua za haraka pale haki ya mwananchi inapokuwa imekiukwa ili kuendelea  kujenga imani ya wananchi kwa  serikali.