Na George Mwakyembe – WKS Dodoma.

Naibu Waziri wa Katiba na Sheria Mhe. Pauline Gekul amepokea taarifa ya utekelezaji wa shughuli za chuo cha Mahakama Lushoto na kuwaasa kufungua matawi ya chuo maeneo mengine nchini akitolea mfano Makao Makuu ya nchi Dodoma.

Mhe. Gekul amepokea taarifa hiyo tarehe 18 Oktoba, 2023 Jijini Dodoma na kusisitiza kuwa chuo kikiwa na matawi katika mikoa mbalimbali kutatoa nafasi kwa vijana wengi wa kitanzania kusoma chuo hicho. Aidha, Gekul amefafanua kuwa mbali ya kutoa mafunzo ya Majaji lakini pia chuo hicho kijikite katika kutoa mafunzo katika kada nyingine za sheria kama vile mafunzo kwa Makatibu wa Majaji na pia mafunzo kwa wanasheria.

Naye Naibu Mkuu wa chuo kwa upande wa Taaluma, Tafiti na Ushauri elekezi Dkt. Goodluck Chuwa ameeleza kuwa tayari wamejipanga kuandaa programu mbalimbali ambazo zimekuwa zikihitajika katika jamii, na kuahidi kuwa chuo kimelibeba wazo la kufungua matawi sehemu zingine za nchi.

Katika historia ya nchi, Chuo cha Mahakama Lushoto ndicho chuo pekee kinachotoa mafunzo kwa Majaji pamoja na Mahakimu.